nadé.mag

Hüt vor mene Jahr bisch du wie en König verabschiedet worde. Über 400 Mensche händ dä Weg us sich gno, zum dir  gegenüber ihri Dankbarkeit und ihri Liebi zeige. Bi jedem vo dene Mensche häsch du ganz en spezielle Platz i ihrem Herze gha Eric. zGseh wie viel Lüt sich für dich, nur für dich versämmlet händ, hät mir i dere Ziit vo dä Unfassbarkeit, Fassigslosigkeit, vom immense Schmerz und vo dä Ratlosigkeit es bitzeli Trost geh. Ich weiss, du häsch viel glitte, viel grübled und dich nöd immer fair behandlet gfühlt. Ich weiss au, dasss du aber  immer kämpft häsch, dich  für dich und vor allem für anderi immer igsetzt häsch. Bis as Endi häsch kämpt. Eric sie händ dich während zwei Stunde reanimiert, das macheds suscht nie! Sie händ dich nöd ufgeh, will nöd ufgeh häsch und witer kämpft häsch. En richtige Krieger! Ich vermisse dis Lächle und dis Lache! Was wür ich geh, zum no eimal dini Stimm ghöre, wie du min Name seisch: "Hey Nadège...".

Vor mene Jahr und 16 Täg isch mis Lebe no Ok gsi. Dä daily huzzle halt. Sie mene Jahr und 15 Täg lidich jede Tag. Du bisch 30 Jahr lang a minere Site gsi. 30 Jahr lang! Und denn vo hüt uf morn bisch eifach nüme da gsi, ohni Vorwarnig. Jede Tag isch sither mit ere gwüssi Leeri gfüllt. Ich funktioniere. Ich han mich vollends id Arbet gstürtzt. Ich gib nöd uf, au wenn mir mängisch danach isch. Aber ich weiss, dass ich dich enttüsche wür, ich wär nöd die Schwöster, wo kennt häsch und ich wür dir au nöd grecht werde. Du bisch en Lebemensch gsi. Und leiderhäsch du viel zfrüeh vo eus müesse gah. Je ne veux pas que ton trépas soit en vain. Früehner han ich mir gseit, dass ich dä Mensche schuldig bin, wo nöd a mene priviligierte Ort gebore und ufgwachse sind, öppis us mir und mim Lebe zmache. Jetzt denk ich mir us irgendmene Grund bin ich no am Lebe und du Eric häsch mir und eus allne zeigt, wie flüchtig sLebe isch, drum sött ich mis nöd verschwende. Und trotzdem fallts mir ehrlich gseit mega schwer. Ich bin müed, ich bin truurig. Ich raff mich dennoch jede Tag zäme für dich Eric.

Ich hoff würkli vo ganzem Herze, dass es dir, det wo du jetzt bisch, guet gaht. Du happy bisch. Ich lieb dich min chline Brüeder!!!